III. Årets aktivitetar og resultat

Frå tildelingsbrevet for 2019 frå Helse- og omsorgsdepartementet:

Hovudmål

Rask og god saksavvikling skal ha høgaste prioritet i arbeidet til Norsk pasientskadeerstatning.
Balansen mellom grundig arbeid og tidsbruk skal vurderast kontinuerleg.

Styringsparameter:

70 % av sakene der erstatningssøkjaren er tilkjend erstatning (medhaldssakene) skal vere ferdigbehandla innan det har gått 24 månader.
Gjennomsnittleg saksbehandlingstid for desse sakene skal ikkje overstige 22 månader.
85 % av sakene der erstatningssøkjaren ikkje blir tilkjend erstatning (avslagssakene) skal vere ferdigbehandla innan det har gått 12 månader.
Gjennomsnittleg saksbehandlingstid for desse sakene skal ikkje overstige åtte månader.
NPE skal halvere talet saker som har vore under ansvarsutgreiing eller utrekning i meir enn to år.

Resultat: Sjå tabell med nøkkeltal.

NPE skal hjelpe departementet med å fastsetje nye tilskotssatsar for privat helseteneste.

Resultat: NPE har hjelpt til med bakgrunnsmateriale og vurderingar. Helse- og omsorgsdepartementet fastsette nye tilskotssatsar med verknad frå 1. januar 2020.

NPE skal utarbeide utkast til forskrift om utrekning av meinerstatning på pasientskadeområdet.

Resultat: Sjå omtale i eiga sak i årsrapporten.

NPE skal arbeide systematisk for å realisere inkluderingsdugnaden til regjeringa, og utvikle rutinar og arbeidsformer i personalarbeidet med sikte på å nå måla for dugnaden.
I årsrapporten skal NPE gjere greie for korleis rekrutteringsarbeidet i etaten har vore innretta for å nå 5 %- målet og dei andre måla for inkluderingsdugnaden.

Resultat: Sjå omtale i eiga sak i årsrapporten.

Offentlege oppdragsgjevarar har som innkjøparar av varer og tenester eit særskilt ansvar for å motverke arbeidslovskriminalitet. Norsk pasientskadeerstatning skal ved tildeling av oppdrag, og i oppfølging av inngåtte kontraktar, sikre at deira leverandørar følgjer lover og reglar. I årsrapporten skal NPE gjere greie for resultat frå oppfølging av inngåtte kontraktar og korleis innkjøpa i verksemda er innretta for å gjennomføre dette omsynet.

Resultat: Som eit ledd i konsernmodellen for administrative tenester i den sentrale helseforvaltinga, blei oppgåver knytte til innkjøp flytta til Norsk Helsenett (SF) 1. januar 2017. NPE påverkar gjennom innspel til kravspesifikasjonar i fellesavtalar mm. NPE har få verksemdsspesifikke innkjøp utover sakkunnigtenester.